Бугун тунда Грузия пойтахти Тбилиси шаҳридаги “Динамо” ўйингоҳида УЕФА Суперкубоги учун беллашув ўз ниҳоясига етди.

“Барселона” ва “Севилья” клублари ўртасида кечган мазкур тўқнашув жуда қизиқарли ва томошабоп кўриниш олди. Дастлаб, Банеганинг фаоллиги эвазига 3-дақиқадаёқ “Севилья” олдинга чиқиб олганди. Бироқ кейин “Барселона” ўзига келди ва Месси ҳамда Рафиньяларнинг голлари эвазига биринчи бўлимда 3:1 ҳисобидаги устунлик билан танаффусга йўл олди.

Иккинчи тайм аввалида ҳам Суарес тўп киритгач, ҳамма “Севилья” мағлуб бўлди, деб турган пайтда Андалуз клуби футболчилари ўзларида куч топа олишди ва ҳисобни 4:4 кўринишига келтиришди.

Қўшимча бўлимларда эса омад “Барселона”га кулиб боди ва 115-дақиқада Педро томонидан киритилган гол эвазига Каталон супер клуби ўз тарихида 5-бор УЕФА Суперкубоги соҳибига айланди.

“Барселона” – “Севилья” 5:4

Голлар: Месси (7, 16), Рафинья (44), Суарес (52), Педро (115) - Банега (3), Рейес (57), Гамейро (72, пен.), Коноплянка (82)

Барселона – тер Штеген, Пике, Матье, Дани Алвес, Ракитич, Бускетс, Иньеста (Серджи Роберто, 63), Маскерано (Педро, 93), Рафинья (Бартра, 78), Месси, Суарес.

Севилья – Бету, Рами, Тремулинас, Коке, Банега, Иборра (Мариано, 80), Крыховяк, Витоло, Крон-Дели, Рейес (Коноплянка, 68), Гамейро (Иммобиле, 80).