2015-йил «Барселона» ва жамоа ҳужумчиси Лионел Месси учун жйда омадли келмоқда. Клуб Испания чемпионатида 1-ўринга кўтарилиб олди, Испания кубоги финалига чиқди, Чемпионлар лигасида чорак финалга чиқиш учун жуда яқинлашиб қолди. Хўш бу муваффақиятлар ниманинг эвазига келмоқда. Бу борада бироз мулоҳаза юритишга қарор қилдик.
Келишмовчиликларга барҳам берилди
«Барселона» ўз майдонида «Селта»га имкониятни бой берганидан кейин, оммавий ахборот воситаларида Месси ва Энрике ўзаро келишолмай қолганликлари ва ҳаттоки жамоа бош мураббийи истеъфога чиқарилиши мумкинлиги ҳақида хабарлар кетма-кетлиги узилмади. Бироқ ўша мағлубият жамоага ижобий таъсир кўрсатди. «Барса» рақибларини аяб ўтирмай, йирик ҳисобларда ғалабалар қозона бошлади. Энрикенинг қўзғалиб қолган курсиси ўз ўрнида қотиб, янада мустаҳкамланди.
Месси «қайтди»
Охирги 2 йил Месси учун унчалик омадли кечмаганди. Бу пайтда «Реал»да Роналду ёрқин порлади ва кетма-кет 2 марта «Олтин тўп»ни қўлга киритди. Ушбу нарса Мессини «уйғониши»га сабаб бўлди. 2015-йил бошланганидан кейин Леони тўхтатиб қолишнинг иложи йўқдек туюлмоқда. Месси Гвардиола давридагидек ўйин намойиш қила бошлади.
Лео бу йили ўтказилган 17 учрашувда рақиблар дарвозаларини 20 марта ишғол қилди. Чемпионатда тўпурарлар баҳсида Роналдудан 10 дан ортиқ гол орқада келаётган эди. Энди эса ундан 2 та тўп фарқи билан ўтиб кетди. Месси агар шу кетишда ўйнаса 2015 йил якунларига кўра бешинчи маротаба олтиндан бўлган тўпни қўлга киритиши мумкин.
Дарвоқеа аргентиналик «Эйбар»га қарши ўйинда ўзини учун бироз ноодатий усулда 2 та гол урди. Ҳужумчи пенальтидан гол уриб, пенальти уролмаслигида айблайдиганларга яхшигина жавоб қайтарган бўлса, иккинчисида боши билан ҳам тўп киритишни устидан чиқди. Демак, Месси ўз устида ишлаб, камчиликларини бартараф этишда давом этмоқда.
Суарес гол уришни бошлаб юборди!
Ёзда 81 млн.еврога сотиб олинган уругвайлик ҳужумчи яна тўпурарлик қобилиятини ишга сола бошлади. Айниқса унинг Чемпионлар лигаси нимчорак финалида сафарда «Манчестер Сити»га урган икки голи катта аҳамият касб этди. Ушбу голлар «Барса»га Манчестердан ғалаба билан қайтишни таъминлади. Бунинг устига Суарес чемпионатда ҳам кетма-кет голлар уриб танқидчиларнинг оғзини ёпиб қўйди.
Ишончли ҳимоя ва дарвоза
«Барселона»нинг муваффақиятларида жамоа ҳимоячилари ва дарвозабонининг ҳам ҳиссаси баланд. Каталонияликлар чемпионатнинг 27 ўйинида ўз дарвозаларидан 16 та тўп олиб чиқишган. «Реал»да бу кўрсаткич 24 га тенг. Браво кўп ўйинларни қуруқ ўтказмоқда. Бунда Пике бошчилигидаги ҳимоя чизиғи вакилларининг ишончли ўйинлари ҳам сабаб бўлмоқда.
«Эл классико»даги ғалаба чемпионликни ҳал қилади!
Агар «Барселона» 1 ҳафтадан кейин бўлиб ўтадиган «Эл Классико»да ғалаба қозона олса, чемпионлик масаласини деярли ҳал қилиб қўйиши мумкин. Зеро қолган ўйинларнинг барчасида «Реал» ғалаба қозонган тақдирда ҳам «Барселона»дан ўтиб кетиши амримаҳол. Энрике шогирдлари ҳозирдагидек ишончли ўйин намойиш этиб туришса, Ла лигада улардан очко олиш осон бўлмаслиги аниқ. Шундай экан каталонияликлар «Эл Классико»да ғалаба қозониш учун жон жаҳдлари билан курашиб олиб боришади.
